Nu Dianti Lain Eta

 Palebah dinya. Pengkolan jalan ka desa. Harita. Teuing poe naon. Teuing jam sabaraha. Asa teu perlu nginget-nginget nu  kitu. Nu puguh mah, harita, ka sareupnakeun. Di palebah dinya, di pengkolan, kuring cinutrung sosorangan. Cinutrung, bari sakapeung lujag lejeg siga nu teu genah hate, siga aya nu ditungguan.

“ah, da enya, sosorangan..” pok teh.  Lain ngahajakeun nyorangan, da memang harita teh,  geus sorangan. Tatangga oge, ting kecewis, nga-hoax unggal hahaokna. Maranehna ting harewos, “euh, dasar lalaki teu gableg cedo, keur nyorangan teh, loba kahayang nu teu uyahan…”.

Lebah dinyana, kuring oge sok reuwas. Reuwas lain pedah sosorangan di pengkolan, wanci sareupna ka peutingna keun. Reuwas teh,  sieun katutuluyan, jadi gering nangtung ngalanglayung, nungguan di pengkolan. Nungguan, nu arek datang, da cenah, aya beja, sok ngaliwat ka lebah dinya.

Ras inget kana lamunan nu kamari. Rarasaan teh bener. Da enya, cenah, di pengkolan ieu, rame ku jalma.  Eta pengkolan teh,  jadi liliwatan. Boh, budak, boh kolot. Pon nya kitu deui ari para rumaja, nu keur meujeuhna tuang toong ka pada rumaja deui mah. Ah, ceuk beja mah, sanajan ieu pengkolan desa, batasanna sawah, tapi endah mun dijadikeun keur tempat panglamunan. Kekedalan  barudak jaman kiwari mah, instragramebel cenah. “Alus rupa keur dijadikan status di media sosial”, kitu ujaring barudak kiwari mah.

Beulah ditueunna sawah. Katingal, ngeplakna hasil panyawah warga desa. Piisukeunna panen, estu pasti pibungaheunna. Di dinya di pengkolan, lamun seug manceran srangenge, lain haneut wungkul nu karasa, tapi endahna alam mungguhing paparinan gusti Alloh, estu matak pisugemaeunna.

Lamun seug manjing ka sareupna. Balebat layung, hurung nyaangan alam, nu ampir-ampiran ka tutupan peuting. Ku eta oge, jeung ku kituna oge, teu weleh matak nyeredet ka na hate, hususna keur sakuringeun harita.

“enyaan..” gerentes hati harita, “cek beja, majar ieu tempat rame dijugjug ku urang lembur, tapi geuning ayeuna bet kieu kaayaanna..”.  Lah, jadi kapikiran kitu nya, “majar rame, naha ari poe ieu, aya teu jauh jeung kaayaan diri. Sepi, nyorangan…”pokna deui.  

Pipikiran ngalayang. Nyawang ka tukang, nyorang ka hareup. Ka tukangna, ras inget ka dongeng ustad di masjid. Ujaring cariosan anjeunna, nujut ka piwuruk ulama kapungkur, yen di sawarga nu sakitu lega tur endahna oge, kanjeng Nabi Adam alaihi salam, geuningan teu betaheun ari nyorangan mah…”, kedal salajengna, ustad ngadawuh deui, “antukna,  kanjeng Nabi Adam As ngadu’a, ka Gusti nu Maha Suci, nyuhunkeun batur keur hirup di sawarga, nu saterasna mah, dikabulkan. Ti harita, kanjeng nabi Adam As di sarengan ku ibu Siti Hawa..”.

Pikiran nepi ka lebah dinya, hate ngarongheap. “duh, boa, kitu rasana. Ari sorangan. Eh, maksudna ari nyorangan…”  pok teh, ngan teu nyoara wungkul, “sanajan sakitu endahna ieu alam, geuning karasa rumek. Hate mah teu bisa dibobodo. Sok sanajan, hiliwirna angon pasosore nu sakitu nyecepna, geuningan kalah karasa panas, ngabayeungyangkeun, ari keur sorangan kieu mah....”

Itu geuningan. Dangdauna ting garupay, ti kajauhan. Siga nu ngajak ka diri, sangkan ngadeukeutan, barengan ngariung. Ngariung jeung nu lain. Tapi, hate tetep ngucap, “ah, da lain eta…”.

Itu geuningan. Angin ngahiliwir, siga ngahajakeun hayang nganter diri, supaya nyorang ka lebah ditu, tempat nu memang can pernah ka ambah samemehna. Sugan jeung sugan aya batur nu wawuh, aya baraya keur ngubaran rasa. Tapi, hate ieu keukeuh kedal, “ah, da lain eta…”.

“Itu geuningan, aya ringkang nu leumpang”. Hate guligah, hudang siga nu rada bungah. Sugan jeung sugan. Eta nu dipiharep. Nu salila ieu, di anti-anti di ieu pengkolan. Meunang nunggu sababaraha lilana. Ngan hanjakal, di palebah pucunghulna teh, “ah, geuningan lain eta,..”.

Tuh, geuningan. Bentang di Beulah wetan. Tos mulai ting pucunghul. Kucap kiceup. Siga nu ngahiap ngampih. Ngampih ka imah, sangkan jauh tina balai. Tapi, keukeuh kedal ucap, “ah, da lain eta…”.

Sakali lain eta. Dua kali lain manehna. Terus keur naon atuh kuring harita di dina ? keur nanahaonan, bet cinutrung palebah dinya ?

Asa teu ari. Memang harita teh, kuring oge bet hayang seuri sorangan. Sabenernah mah, da memang teu jangji jeung nu liana oge. Barina oge, da harita mah, teu aya jangji, teu aya niat. Ngan, gerentes hate wungkul, “susuganan, manehna ngaliwat, ngalanglang ka palebah dinya..”.

Ih, kumaha ieu teh, “ari teu pesen mah, nya moal aya atuh, tukang paket nyampeurkeun…!!” Sora budak, satengah ngagorowok kana ceuli nu katuhu.

Nya atuh, ari geus dikitukeun mah, hate kuring jadi leah, ngaikhlaskeun diri, mulang, sok sanajan, hate mah tetep masih aya kahayang nu teu acan tinekanan.